Educaziun ala sanité

Educaziun ala sanité

L’educaziun ala sanité te scora passa fora por chë pert interdisziplinara y en pert ascognüda dl curriculum che tira gonot ala cörta tla predominanza dl insegnamënt dles materies y di savëis, mo che é impó tres presënta – sce an ó o ne n’ó. Por savëi ci conescënzes, abilités y facoltés che an impara a scora ti liví desvalis, bastel tó tla man les “indicaziuns provinziales”.
L’educaziun y la promoziun dla sanité messess jí sura i proiec fora. Ares mëss deventé n stil de vita, na manira da se raporté y lauré deboriada, n bun stromënt tl condüje classes tignin cunt dla globalité y complessité de ci che sozed vigni de. Impede se “borjé fora” cun ci che i fajun messunse “borjé” deplü por la fascinaziun dl’ert dl insigné y imparé.

La promoziun dla sanité y la prevenziun de maraties mëss avëi le medemo pëis

Dötes les sciënzes ciara da ti garantí ala porsona le majer bëgnester che ara vá y dër gonot dijunse instësc che “al basta ester sanns”. A ci sanité ponsunse mo? A chëra fisica zënza maratia y desturbs organics o plütosc a chëra psichica y mentala che tëgn fora y dëida superé la maratia? Le conzet de sanité é tan ampl che an ne sciafia nia da dé na definiziun che toles ite düc i ciamps y düc i fenomens. Y la personalité de vigni porsona é tan desvalia che ara ne vá nia da mëte dant a düc la medema vijiun dles cosses. Istituziuns, foliec, mass-media digitai, gurus, industries... proa te n gröm de manires da ti rové plü daimpró ai dejiders y bojëgns che la porsona adora por realisé süa vita y nos un la poscibilité da chirí fora, da se lascé influenzé... o ince nia.
I valurs y i orientamënc tl monn de vigni creatöra vëgn imprömadedöt vic y dá inant tla familia y spo amplis y aprofondis dal sistem formatif y educatif dla scora y sambëgn ince da tröpes d’atres fontanes.

Trëi studëntes dla Evangelische Schule Berlin Zentrum Alma de 13, Jamila de 14 y Lara-Luna de 15 agn - á podü scrí instësses n liber dal titul “Wie wir Schule machen – Lernen, wie es uns gefällt” (dé fora dl 2014 dala ciasa edituria Knaus).
Le pröm capitul é intitolé: “Sciöche i orun imparé y ci che nes é important” y les mitans scrí che “la scora é öna dles mius invenziuns dl monn”, dantadöt sciöche post sigü da incunté por tröc agn i compagns y les compagnes y imparé a se conësce. Mo nia ma, ince por imparé, fá domandes y ciafé respostes, por fá esperiënzes y studié fora planns por realisé la vita de vignun y vignöna. La scora é le post ideal por crësce, sce le clima y l’atmosfera stimenëia.
Y sce ara ne foss nia insciö por n valgügn (o tröc) ince chiló da nos? Ci minunga á pa pordërt i scolars y les scolares dla scora? La conesciunse o él pa damí da ne la lascé nia gní a löm? Ales auturies dl liber ti sál sciode che le stüde PISA confrontëies ma i resultac dles prestaziuns  y ne damanes nia ciüna che é la scora plü coriosa, manco da stufé, olache la mensa é la miú, olache scolars, scolares y personal insegnant se devertësc ince, olache al vëgn conscidré l’entusiasm, l’otimism o le control de se. Les trëi studëntes á metü adöm na süa inrescida PISA, mo tröc direturs y tröpes direturies ti á proibí da la partí fora te süa scora. Interessant y da ponsé do, no pa?



Pedagogia sessuala

La promoziun dla sanité scomëncia pro se instësc

Renforzamënt dles competënzes vitales

Alimentaziun y movimënt

Prevenziun da dependënzes