Comunicac dl ofize stampa

19 jones y jogn a Rabat, ala pert ince Sofia Ferdigg

Sön scomenciadia dl Ofize Sorvisc por la jonëza él sté indöt 19 jones y jogn dl Südtirol che é stá por na perioda a vijité y incunté families tl Marocco.

Sofia Ferdigg (la cuarta da man dërta tla pröma fila dancá) adöm cun les jones y i jogn che á tut pert al iade a Rabat. - Foto: LPA/Amt für Jugendarbeit

“Por me él sté na beliscima esperiënza che i á podü to pert al proiet ‘Hello Ciao Maroc’. Na esperiënza unica che ma dé la poscibilité da imparé a conësce n’atra cultura, porsones nöies cun chëres che i á podü me confronté de por de”, chëstes é les impresciuns de Sofia Ferdigg, che é stada öna dles partezipantes dl iade tl Marocco tres le proiet “Hello Ciao Maroc”. Adöm cun d’atres jones y jogn, indöt ál tut pert al iade 19 partezipanc danter i 17 y i 22 agn, á Sofia Ferdigg podü sojorné por na perioda de 10 dis pro na familia tla capitala dl Marocco a Rabat.

„Hallo Ciao Maroc“ é n proiet dl Ofize Sorvisc por la jonëza dla Repartiziun Cultura todëscia metü da jí en colaboraziun cun l’organisaziun pro n monn solidal OWE dal 2010 inant. I partezipanc y les partezipantes é stá por l’ocajiun ghesć pro les families di jogn dla medema eté tl Marocco y á podü insciö imparé da conësce la vita da vigni dé dles families dl Marocco cun sües tradiziuns y usanzes. Le program dl proiet intercultural á preodü che i jogn á podü partezipé danmisdé a n curs d’introduziun dl lingaz y dla cultura araba, domisdé él sté sön le program ativités dl tëmp lëde adöm cun i jogn dl post.  Sön le program él sté danter l’ater ince jüc y ativités de aorela cörta che é gnüs organisá dala organisaziun partner Bassma. Les jones y i jogn é gnüs acompagná da Abdelouahed El Abchi dl Ofize Jonëza dla Provinzia y da Johanna Hofer y Adrian Luncke dl OEW.

“Por merit dl iade che i á fat sunsi stada buna da capí, che ince sce les porsones y cultures é desfarëntes él impó tröpes cosses y usanzes che nes coliëia y che é bunes da cherié na rëi”, á dit Miriam Pertner, na partezipanta al proiet. ”Na gran richëza culturala y amizizies nöies cun porsones da n gran cör, sciöche ince le mangé, la cultura y l’ert é les impresciuns che i me tolará para por tres”, á ince dit Johanna Hofer, öna dles coordinadësses dl proiet.

„Closec pac y zënza papier, jënt stlüta y curida pro, usc grautes y edli da temëi” – insciö s’imaginâ Jakob Dellago la cultura ti paîsc arabics. “Mo chësta idea se möda do le pröm contat cun i marochins. Ai é daverc y se mostra süa manira de vire, an pó insciö la confronté cun nosc stil de vita. Ince sce al é tröpes desfarënzies, vëgnel impó fora amicizies y dialogs soc. Le dër fin de dötes les porsones é pö chël da sté adöm, zënza emarginaziun y cun tröpa vëia da vire!”

La cossa plü bela de “Hallo Ciao Maroc” é stada por Leonie Wimmer chëra che ara á podü ciafé cun chësc proiet informatif y intercultural na idea nöia d’ëra instëssa y dl monn: “Les mans depëntes cun henna tl hamam, cun incëria n gröm d’ëres desnüdes, i ê propi cuntënta a Rabat.” Por Benedikt Hinteregger é chësc iade sté na ocajiun por imparé da conësce y capí damí la cultura musulmana, n’esperiënza unica y beliscima”, atramënter co na vacanza tradizionala olache an ciara da ti sciampé ala vita da vigni dé y olache an se stlüj ite te n monn falz, te n hotel de lus.”

Laur intercultural cun i jogn

Le laur intercultural cun i jogn alda pro i ciamps plü importanc dl Ofize Sorvisc por la jonëza. Al se trata de n laûr por i jogn che unësc y che dá so contribut por ester bugn da jí sura les barieres culturales fora. Cun chëstes iniziatives y cun chisc iadi de stüde ti dan la poscibilité ai jogn y ales jones da imparé da conësce d’atres cultures.

USP

Galaria dales fotografies