Comunicac dl ofize stampa

Scores altes, dai 7 de jená leziuns en presënza al 75 %

Dai 7 de jená garantësc les scores altes dl Südtirol indô leziuns en presënza por le 75 porcënt. Alfreider, Vettorato y Achammer á presenté les mosöres planificades.

La presentaziun dles mosöres por le scomenciamënt dla scora incö te na conferënza stampa (dmc): Achammer, Alfreider, Vettorato. (Foto: ASP/Roman Clara)

Da en jöbia ai 7 de jená sarál indöt  395 scolares y scolars dles scores altes ladines che jará indô zoruch te classa. Chësc fej fora le 75 porcënt dles scolares y di scolars dles scores altes ladines. Les mosöres nezesciares por garantí l’insegnamënt en presënza é gnüdes presentades incö (ai 5 de jená) dai trëi assessurs por la scora Daniel Alfreider, Giuliano Vettorato y Philipp Achammer.

L’assessur Alfreider: “Ghiranza prinzipala insegnamënt en presënza“

Sides por la scora ladina co por döt Südtirol él important da podëi garantí na pert dl insegnamënt en presënza. “La colaboraziun cun i colegs te Junta y cun les Intendënzes, dantadöt ince cun le Departimënt dla scora ladina, é dër buna. Le contat personal é n gran valur por la scora, naturalmënter mantignin dötes les desposiziun de segurëza”. L’assessur á sotligné che al é gnü potenzié la mobilité por garantí deplü segurëza y che al é fondamental che vignun de nos dais so contribut. Al é ince preodü tesć asvels a livel volontar por insegnantes y insegnanc y scolares y scolars te dötes les direziuns dles scores altes.

Achammer y Vettorato: “Travert arjunt deboriada”

Ince por ci che reverda les scores altes todësces sarál garantí dal 7 de jená inant le 75 porcënt de insegnamënt en presënza. “Al é döes rajiuns importantes por l’insegnamënt en presënza: un n iade por garantí ales classes che stlüj jö le percurs formatif por imparé i conzec prinzipai y ince dantadöt por i raporc soziai che é fondamentai por i scolars”, á dit Achammer.

Por l’assessur por la scora taliana Vettorato é le scomenciamënt dl insegnamënt en presënza n segnal de speranza por döta la comunité te chësta perioda de dificolté. Por les scores talianes él preodü insegnamënt en presënza da 50 cina al mascimo 75 porcënt dles scores altes.

Al é important da tigní ite les regoles por ci che reverda les entrades desfarëntes, l’oblianza da vistí les mascheres y da fá i screenings por insegnanc y scolars. Les lesziuns fates a destanza é gnüdes fates cina sëgn cun gran profescionalité da pert de düc i interessá.

Video dla conferënza stampa sön Youtube

USP/tl/sf

Galaria dales fotografies