Comunicac dl ofize stampa

De dl lingaz dla uma, al vëgn chirí parores che se somëia

Iniziativa dl Sorvisc por l’integraziun en ocajiun dl De dl lingaz dla uma, por ciafé parores che se somëia te deplü lingac. I pröms 200 che mëna so contribut ciafa na malieta.

Le logo dl De dl lingaz dla uma

En ocajiun dl De UNESCO dl lingaz dla uma organisëia le Sorvisc de coordinamënt por l’integraziun n’iniziativa che vëiga dant la partezipaziun di zitadins por ciafé parores che se somëia te deplü lingac. Deache mec i lingac de döt le monn é en prigo d’estinziun, recorda l’UNESCO ai 21 de forá l’importanza dl lingaz dla uma sciöche espresciun dl’identité culturala y le multilinguism sciöche tlé por se capí damí un cun l’ater y por se respeté deplü. En colaboraziun cun les scores, les lies interculturales, i zëntri por la jonëza, i comités y les strotöres de formaziun y döta la popolaziun interessada, ó le Sorvisc de coordinamënt por l’integraziun cöie adöm parores de deplü lingac che se somëia o che recorda n’atra parora por talian, todësch o ladin (p. ej.:  wino in polacco = vino por talian; Musse por arabo = Messer por todësch).

Chëstes parores dess gní scrites tl lingaz original, traslatades tl ladin, talian o todësch, al pó ince gní scrit da olá che la parora vëgn. La parora dess ince gní metüda en relaziun cun la parora che ti somëia tl ladin, todësch y talian y la pronunzia dess gní tuta sö te n file audio o video, olache al pó ince gní dé spligaziuns implü.

I contribuc mëss gní mená por mail a coordinamento-integrazione@provincia.bz.it cina ai 1 de forá 2021, adöm cun le formular che an ciafa sön la plata internet dla Provinzia dedicada al’integraziun, te n format word o pdf o sciöche file audio y video. Ai gnará spo valutá en colaboraziun cun l’Ufize Sorvisc por la jonëza dan gní publicá sön  www.provincia.bz.it/integrazione. Ales prömes 200 porsones che menará ite so contribut ti gnaral scinché na malieta (mosöra M o L) dla campagna de sensibilisaziun #multilingual!, che an podará jí a to pro le Sorvisc de coordinamënt por l’integraziun tla Strada Andreas Hofer 18 a Balsan.

USP/jw/fgo

Galaria dales fotografies