Comunicac dl ofize stampa

Iscriziuns ales scores altes: Consulënza y orientamënt scolastich

Cina ai 15 de forá él poscibl por scolares y scolars dla terza classa dla scora mesana da se scrí ite te na scora alta o profescionala. Inann él gnü amplié l'informaziun online.

L'oferta dles scores altes ladines (Grafica: Intendënza y Cultura ladina)

Dai 15 de jená cina ai 15 de forá dl 2021 él poscibl por scolares y scolars dla terza classa dles scores mesanes da se scrí ite por l’ann de scora 2021/22 te na scora alta o profescionala tl Südtirol. Por ti pité n’informaziun ampla y ajornada él le Ofize Orientamënt scolastich y profescional che pita na suravijiun de dötes les scores y de dötes les ofertes de formaziun tl Südtirol.

La plata pita informaziuns sön les materies prinzipales de vigni scora y ci interés che les scolares y i scolars dess avëi por frecuenté na scora o l’atra. Al é ince poscibl da se informé spo diretamënter sön les plates internet dles singules scores, ince deache inann ne él nia poscibl da pité i dis dla porta daverta en presënza.

Por ci che reverda les scores altes ladines se tratél dl Istitut Tecnich Economich Raetia a Urtijëi, dles Scores altes da La Ila a La Ila (Lizeum Sciënzes Umanes, Lizeum Linguistich, Istitut Tecnich Economich), dl Lizeum artistich y dla Scora Profescionala Cademia a Urtijëi.

Implü él ince poscibl da se informé tres n’incuntada cun n aconsiadú/n’aconsidëssa dl monn dl laur dla Provinzia en presënza o online. Por iscriziuns contaté l’Ofize Orientamënt scolastich y profescional tla strada Andreas Hofer 18 (tel. 0471 413350), online o ince pro les sëntes sön döt le teritore provinzial (Picolin y Urtijëi).

 

USP/jw

Galaria dales fotografies