Educaziun ala sanité y mobilité
Tl moto IÖ ME MÖI POR MIA SANITÉ Y MOBILITÉ stál ite dötes nostes intenziuns ch’i colegun cun le se sté bëgn dla porsona te söa totalité y integrité: fisicamënter, psichicamënter y spiritualmënter. Sce la scora intiera – conscidran ince la sfera soziala incëria – devënta n post da imparé y lauré imposté sön la sanité plü ampla poscibla spo él dötes les porsones che n’aprofitëia.
Educaziun y promoziun de sanité y mobilité mëss jí sora l’azionism de singui proiec fora. Sü contignüs mëss deventé stil de vita, manira da se raporté y lauré deboriada vigni de, n stromënt tl condüje classes y tla valutaziun individuala de porsones y nia inultima n rampin por coltivé chë ligrëza y chël amur ch’i ún por nosc se sté bëgn instësc.
La cualité dla formaziun n’un davagna y döt le sistem educatif s’arichësc de strategies che renforzëia les competënzes fondamentales por costruí na comunité olache vignun y vignöna ciafa so post por realisé le miú söes carateristiches, söa identité, söa personalité, söa creativité y sü soms. Le lian sterch danter scora y familia incentivëia a mëte i mituns y les mitans / i jogn y les jones al zënter dl’atenziun y a chirí deboriada chëres strategies educatives y formatives che á valüta te trames les istituziuns. I valurs y les nezescités basilares dla porsona dess ciafé n bun terac por gní sentades, zidlades y spo viüdes fora por na vita intiera, anfat olá.
La creaziun de lercs nöies te nostes scores y incër nostes scores ia portass a d’atres poscibilites de se raporté y s’incunté - ci che é la basa de nosc lauré deboriada. La conzentraziun y la creativité é le resultat de impulsc ch’i ciafun incër nos ia y la mobilité de nosc ciorvel se condüj a realisé rodunt ci ch’i aratun le miú por nos y nosta sozieté.
