Tla gasëta ofiziala dla Regiun Trentin-Südtirol nr. 24/I-II di 17.06.2003 él gnü publiché le Decret dl presidënt dla Junta Provinziala di 3.6.2003 nr. 42/2, cun chël che al é gnü fissé i 26 d’otober 2003 sciöche dé por desfiré fora les lîtes dl Consëi Provinzial che vëgn a se le dè en chësc ann.

Adöm cun chësc aràton che al vais debojëgn da recordè che la prozedöra por chëstes lîtes vëgn dant tla lege provinziala di 14.03.2003, nr. 4 (desposiziuns por les lîtes dl Consëi Provinzial de Südtirol tl 2003), che fej referimënt tl caje de de plü passaji porater ala lege regionala bele conesciüda di 8-8-1983, nr. 7 cun mudaziuns y integraziuns suandëntes; implü aràton che al vais debojëgn da recordè che dal terminn lital bele nominé depënel automaticamënter na lingia de d’atres tomanzes importantes suradöt por les aministraziuns comunales.

I terminns plü importanć y i singui dovëis aministratifs lià a chisc vëgn reportà tl calënder chilò dessot, che é gnü stabilì adöm cun le consorz di comuns; chësta ajënda dà inće dant le material che va debojëgn por desfiré fora les lîtes che gnarà metü a desposiziun dala aministraziun provinziala.

L’ater material che i comuns adora por arjigné ca les listes litales y por desfiré fora i atri dovëis gnarà metü a desposiziun dal consorz di comuns tres na via telematica.

1. trëi copies dl placat cun les listes di candidać lassura; öna de chëstes mëss restè a desposiziun dl ofize lital y les atres mëss gnì tacades fora tl salf lital;
2. döes copies dl placat cun lassura les desposiziuns prinzipales por les lîtes y de chël cun lassura les sanziuns penales plü importantes;
3. na copia dles istruziuns por i ofizi de seziun cun les desposiziuns de lege lassura;
4. zetoles litales;
5. döes copies dla tabela dles usc;
6. na copia dl protocol di laûrs litai;
7. le register dles zetoles di litadus y dles litadësses;
8. les listes injuntades por les seziuns di ospedai, dles sëntes speziales y di ofizi destacà;
9. le timber sigilé;
10. 10. l’ater material d’ofize, sciöche inće la coperta por l’injop nr. 2 y la coperta che ti mëss gnì dada jö al comun.

Por daidé i comuns da organisé i laûrs litai vëgnel metü a desposiziun sön chësc sit n calënder cun les dates de tomanza dles singoles oblianzes.

ćiara tomanzes por i comuns