I partis y i movimënć politics che à ciafè dales ultimes lîtes regionales cun so simbol almanco un n scagn ne mëss nia cöie adöm firmes. Te chësc caje bàstel che la detlaraziun de presentaziun dla lista sides firmada dal secretêr regional o provinzial, o sce chësc manćia, sce al n’é nia o sce al ne po nia le fà, dal presidënt regional o provinzial dl partì o dl movimënt politich o dala porsona inćiariada da chisc tres n mandat autentiché dal notar. Sce chisc organns n’é nia preodüs dai statuć o sce ai n’é nia en ćiaria – belanfat por ći gauja - él le diretur regional o provinzial dl partì o dl grup politich che firma o che ciafa le mandat che va debojëgn. Inće te chësc caje mëssel gnì desmostrè la inćiaria de chi che dà jö o eventualmënter de chi che vëgn menà aladô dles medemes modalitês scrites dant por la deponüda di simboi.
La firma mëss ester autenticada.

Les listes di candidać presentades da n partì o n movimënt nü, chël ô dì chëres presentades dai partis o dai movimënć politics che n’à nia arjunt dales ultimes lîtes regionales cun so simbol almanco un n scagn, mëss gnì firmades da nia manco co 400 y nia plü co 600 litadus che à le dërt da lité le Consëi dla Provinzia Autonoma de Balsan.

Vigni litadù po firmé madër öna na detlaraziun de presentaziun de lista di candidać.

Chi che firma mëss gnì dà dant cun cognom, inom, post y data de nasciüda y implü mëssel ćiamò gnì dè dant por vignun le comun dla provinzia de Balsan te chël che al é scrit ite tles listes litales.

La firma de chi che la mët mëss gnì autenticada.L’autenticaziun mëss gnì fata atira do che al é gnü firmé. Al vëgn autentiché tres l’atestaziun da pert de n funzionar publich che desmostra che al é gnü firmé en süa presënza do che al é gnü controlè la identité dla porsona che firma. Al messarà gnì dè dant implü ćiamò les modalitês de identificaziun, la data y le post de autentificaziun, l’inom y le cognom dl funzionar publich sciöche inće süa inćiaria; implü messaràl gnì metü laprò la firma scrita fora dl funzionar publich y le timber dl ofize. Les firmes mëss gnì autenticades, inće deplü te n iade, dal notar, dal licare de pêsc, dal canzlier de n ofize iudiziar o dal secretêr de comun.

1. Adöm cun la detlaraziun de presentaziun dla lista di candidać mëssel gnì presentè i zertificać scrić fora dal ombolt, inće deplü te n iade, che desmostra che chi che firma é scrić ite tles listes litales dl comun y à les condiziuns de residënza por adorè le dërt de lité pro les lîtes dl consëi provinzial. Dal zertificat mëssel gnì fora tlermënter le possès dles condiziuns de residënza
2. Cun la lista di candidać mëssel inće gnì presentè le simbol relatif, te trëi copies, en blanch y fosch sön na plata tl format da protocol y stlüt ite te n cërtl de 10 cm de diameter, anfat a chël che é gnü dè jö y azetè
3. Por vigni candidat mëssel implü ćiamò gnì presentè:

   a) na detlaraziun aposta che al vëgn azetè la candidatöra aposta. La firma che al vëgn azetè la candidatöra mëss gnì autenticada. L’autenticaziun mëss gnì scrita fora do che al é gnü firmé. Al vëgn autentiché tres l’atestaziun da pert de n funzionar publich, che desmostra che al é gnü firmé en süa presënza do che al é gnü controlè la identité dla porsona che firma. Al messarà gnì dè dant implü ćiamò les modalitês de identificaziun, la data y le post de autenticaziun, l’inom y le cognom dl funzionar publich sciöche inće süa inćiaria; laprò mëssel inće gnì metü la firma scrita fora dl funzionar publich y le timber dl ofize. Les autenticaziuns po gnì fates dal notar, dal licare de pêsc, dal canzlier de n ofize iudiziar o dal secretêr de comun.Tla detlaraziun de azetaziun dla candidatöra dl candidat mëssel gnì dè dant le grup linguistich de portignënza
   
   b) le zertificat de nasciüda;
   
   c) le zertificat, scrit fora dal ombolt, che desmostra la iscriziun tles listes litales de n comun dla Regiun cun la data di 09.09.2003;
   
   d) la detlaraziun de portignanza al grup linguistich